aish se be-niyaz hain hum log
be-KHud-e-soz-o-saz hain hum log
jis tarah chahe chheD de hum ko
tere hathon mein saz hain hum log
be-sabab iltifat kya mani
kuchh to ai chashm-e-naz hain hum log
mahfil-e-soz o saz hai duniya
hasil-e-soz o saz hain hum log
koi is raaz se nahin waqif
kyun sarapa niyaz hain hum log
hum ko ruswa na kar zamane mein
bas-ki tera hi raaz hain hum log
sab isi ishq ke karishme hain
warna kya ai 'majaz' hain hum log
Ghazal
Aish se be-niyaz hain hum log
Asrar-ul-Haq Majaz