achchhe mausam mein tag-o-taz bhi kar leta hun
par nikal aate hain parwaz bhi kar leta hun
tujh se ye kaisa talluq hai jise jab chahun
KHatm kar deta hun aaghaz bhi kar leta hun
ghumbad-e-zat mein jab gunjne lagta hun bahut
KHamushi toD ke aawaz bhi kar leta hun
yun to is habs se manus hain sansen meri
waise diwar mein dar baz bhi kar leta hun
sab ke sab KHwab main taqsim nahin kar deta
ek do KHwab pas-andaz bhi kar leta hun
Ghazal
Achchhe mausam mein tag-o-taz bhi kar leta hun
Anjum Saleemi