aankhon mein bij KHwab ka bone nahin diya
ek pal bhi us ne chain se sone nahin diya
ashkon se dil ka zaKHm bhi dhone nahin diya
mujh ko KHud apne haal pe rone nahin diya
ye aur baat hai wo mera ho nahin saka
lekin mujhe kisi ka bhi hone nahin diya
gum hona chahta tha main KHud apne aap mein
mujh ko tere guman ne khone nahin diya
shamil hai us ki zat mein mera wajud bhi
tanha kisi bhi moD pe hone nahin diya
Ghazal
Aankhon mein bij KHwab ka bone nahin diya
Khawaja Javed Akhtar