hum ne ghar ki salamti ke liye
KHud ko ghar se nikal rakkha hai

Azhar Adeeb

---

---

dard-e-hijrat ke satae hue logon ko kahin
saya-e-dar bhi nazar aae to ghar lagta hai

Bakhsh Layalpuri

---

---

kabhi to sham Dhale apne ghar gae hote
kisi ki aankh mein rah kar sanwar gae hote

Bashir Badr

---

---

meri qismat hai ye aawara-KHirami 'sajid'
dasht ko rah nikalti hai na ghar aata hai

Ghulam Husain Sajid

---

---

ghar ki wahshat se larazta hun magar jaane kyun
sham hoti hai to ghar jaane ko ji chahta hai

Iftikhar Arif

---

---

mere KHuda mujhe itna to mo'tabar kar de
main jis makan mein rahta hun us ko ghar kar de

Iftikhar Arif

---

---

tamam KHana-ba-doshon mein mushtarak hai ye baat
sab apne apne gharon ko palaT ke dekhte hain

Iftikhar Arif

---

---