kya kya duaen mangte hain sab magar 'asar'
apni yahi dua hai koi muddaa na ho

Asar Lakhnavi

---

---

duaen mangi hain saqi ne khol kar zulfen
basan-e-dast-e-karam abr-e-dajla-bar baras

Aziz Lakhnavi

---

---

na jaane kaun si manzil pe ishq aa pahuncha
dua bhi kaam na aae koi dawa na lage

Aziz-ur-Rahman Shaheed Fatehpuri

---

---

abhi rah mein kai moD hain koi aaega koi jaega
tumhein jis ne dil se bhula diya use bhulne ki dua karo

Bashir Badr

---

---

dua karo ki ye pauda sada hara hi lage
udasiyon mein bhi chehra khila khila hi lage

Bashir Badr

---

---

kisi ne chum ke aankhon ko ye dua di thi
zamin teri KHuda motiyon se nam kar de

Bashir Badr

---

---

main ne din raat KHuda se ye dua mangi thi
koi aahaT na ho dar par mere jab tu aae

Bashir Badr

---

---