meri aankhon mein tere pyar ka aansu aae
koi KHushbu main lagaun teri KHushbu aae
waqt-e-ruKHsat kahin tare kahin jugnu aae
haar pahnane mujhe phul se bazu aae
main ne din raat KHuda se ye dua mangi thi
koi aahaT na ho dar par mere jab tu aae
in dinon aap ka aalam bhi ajab aalam hai
tir khaya hua jaise koi aahu aae
us ki baaten ki gul-o-lala pe shabnam barse
sab ko apnane ka us shoKH ko jadu aae
us ne chhu kar mujhe patthar se phir insan kiya
muddaton baad meri aankhon mein aansu aae
Ghazal
Meri aankhon mein tere pyar ka aansu aae
Bashir Badr