dikhai deta hai jo kuchh kahin wo KHwab na ho
jo sun rahi hun wo dhoka na ho samaat ka

Fatima Hasan

---

---

hamari nasl sanwarti hai dekh kar hum ko
so apne-ap ko shaffaf-tar bhi rakhna hai

Fatima Hasan

---

---

kab us ki fath ki KHwahish ko jit sakti thi
main wo fariq hun jis ko ki haar jaana tha

Fatima Hasan

---

---

KHwabon par iKHtiyar na yaadon pe zor hai
kab zindagi guzari hai apne hisab mein

Fatima Hasan

---

---

kitne achchhe log the kya raunaqen thin un ke sath
jin ki ruKHsat ne hamara shahr suna kar diya

Fatima Hasan

---

---

koi nahin hai mere jaisa chaaron or
apne gird ek bhiD saja kar tanha hun

Fatima Hasan

---

---

kya kahun us se ki jo baat samajhta hi nahin
wo to milne ko mulaqat samajhta hi nahin

Fatima Hasan

---

---