is ghar ke chappe chappe par chhap hai rahne wale ki
mere jism mein mujh se pahle shayad koi rahta tha

Aziz Bano Darab Wafa

---

---

jaane kitne raaz khulen jis din chehron ki rakh dhule
lekin sadhu-santon ko dukh de kar pap kamae kaun

Aziz Bano Darab Wafa

---

---

jab kisi raat kabhi baiTh ke mai-KHane mein
KHud ko banTega to dega mera hissa mujh ko

Aziz Bano Darab Wafa

---

---

jin ko diwar-o-dar bhi Dhak na sake
is qadar be-libas hain kuchh log

Aziz Bano Darab Wafa

---

---

kahne wala KHud to sar takiye pe rakh kar so gaya
meri be-chaari kahani raat bhar roti rahi

Aziz Bano Darab Wafa

---

---

KHwab darwazon se daKHil nahin hote lekin
ye samajh kar bhi wo darwaza khula rakkhega

Aziz Bano Darab Wafa

---

---

kisi janam mein jo mera nishan mila tha use
pata nahin ki wo kab us nishan tak pahuncha

Aziz Bano Darab Wafa

---

---