chhuT jae agar daman-e-kaunain to kya gham
lekin na chhuTe hath se daman-e-mohammad

Asghar Gondvi

---

---

dastan un ki adaon ki hai rangin lekin
is mein kuchh KHun-e-tamanna bhi hai shamil apna

Asghar Gondvi

---

---

ek aisi bhi tajalli aaj mai-KHane mein hai
lutf pine mein nahin hai balki kho jaane mein hai

Asghar Gondvi

---

---

hal kar liya majaz haqiqat ke raaz ko
pai hai main ne KHwab ki tabir KHwab mein

Asghar Gondvi

---

---

hum us nigah-e-naz ko samjhe the neshtar
tum ne to muskura ke rag-e-jaan bana diya

Asghar Gondvi

---

---

har ek jagah teri barq-e-nigah dauD gai
gharaz ye hai ki kisi chiz ko qarar na ho

Asghar Gondvi

---

---

ishq ki betabiyon par husn ko rahm aa gaya
jab nigah-e-shauq taDpi parda-e-mahmil na tha

Asghar Gondvi

---

---