kahte ho ki hamdard kisi ka nahin sunte
main ne to raqibon se suna aur hi kuchh hai

Ameer Minai

---

---

KHanjar chale kisi pe taDapte hain hum 'amir'
sare jahan ka dard hamare jigar mein hai

Ameer Minai

---

---

KHuda ne nek surat di to sikho nek baaten bhi
bure hote ho achchhe ho ke ye kya bad-zabani hai

Ameer Minai

---

---

KHushamad ai dil-e-betab is taswir ki kab tak
ye bola chahti hai par na bolegi na boli hai

Ameer Minai

---

---

KHushk seron tan-e-shaer ka lahu hota hai
tab nazar aati hai ek misra-e-tar ki surat

Ameer Minai

---

---

KHun-e-nahaq kahin chhupta hai chhupae se 'amir'
kyun meri lash pe baiThe hain wo daman Dale

Ameer Minai

---

---

KHwab mein aankhen jo talwon se malin
bole uff uff panw mera chhil gaya

Ameer Minai

---

---