as ek lams ki jal jaen sab KHas-o-KHashak
ise visal bhi kahte hain KHush-bayani mein

Farhat Ehsas

---

---

aa mujhe chhu ke hara rang bichha de mujh par
main bhi ek shaKH si rakhta hun shajar karne ko

Farhat Ehsas

---

---

acha ke laen kisi bhi yatim bachche ko
aur us ke hath se taKHliq-e-kainat karen

Farhat Ehsas

---

---

aDa wasia hai us ke jamal ka manzar
wo aaine mein to bas muKHtasar sa rahta hai

Farhat Ehsas

---

---

aurten kaam pe nikli thin badan ghar rakh kar
jism KHali jo nazar aae to mard aa baiThe

Farhat Ehsas

---

---

ai sadaf sun tujhe phir yaad dila deta hun
main ne ek chiz tujhe di thi guhar karne ko

Farhat Ehsas

---

---

ai KHuda meri ragon mein dauD ja
shaKH-e-dil par ek hari patti nikal

Farhat Ehsas

---

---

ab dekhta hun main to wo asbab hi nahin
lagta hai raste mein kahin khul gaya badan

Farhat Ehsas

---

---

aankh bhar dekh lo ye virana
aaj kal mein ye shahr hota hai

Farhat Ehsas

---

---