jine bhi nahin dete marne bhi nahin dete
kya tum ne mohabbat ki har rasm uTha Dali

Fani Badayuni

---

---

aankh uThai hi thi ki khai choT
bach gai aankh dil pe aai choT

Fani Badayuni

---

---

jaur ko jaur bhi ab kya kahiye
KHud wo taDpa ke taDap jate hain

Fani Badayuni

---

---

jalwa o dil mein farq nahin jalwe ko hi ab dil kahte hain
yani ishq ki hasti ka aaghaz to hai anjam nahin

Fani Badayuni

---

---

is dard ka ilaj ajal ke siwa bhi hai
kyun chaarasaz tujh ko ummid-e-shifa bhi hai

Fani Badayuni

---

---

ek muamma hai samajhne ka na samjhane ka
zindagi kahe ko hai KHwab hai diwane ka

Fani Badayuni

---

---

ibtida-e-ishq hai lutf-e-shabab aane ko hai
sabr ruKHsat ho raha hai iztirab aane ko hai

Fani Badayuni

---

---

hote hain raaz-e-ishq-o-mohabbat isi se fash
aankhen zaban nahin hai agar be-zaban nahin

Fani Badayuni

---

---

hijr mein muskurae ja dil mein use talash kar
naz-e-sitam uThae ja raaz-e-sitam na fash ka

Fani Badayuni

---

---