kai chand the sar-e-asman ki chamak chamak ke palaT gae
na lahu mere hi jigar mein tha na tumhaari zulf siyah thi

Ahmad Mushtaq

---

---

jo muqaddar tha use to rokna bas mein na tha
un ka kya karte jo baaten na-gahani ho gain

Ahmad Mushtaq

---

---

jis ki sanson se mahakte the dar-o-baam tere
ai makan bol kahan ab wo makin rahta hai

Ahmad Mushtaq

---

---

jaise pau phaT rahi ho jangal mein
yun koi muskurae jata hai

Ahmad Mushtaq

---

---

jahan-e-ishq se hum sarsari nahin guzre
ye wo jahan hai jahan sarsari nahin koi shai

Ahmad Mushtaq

---

---

jahan Dale the us ne dhup mein kapDe sukhane ko
Tapakti hain abhi tak rassiyan aahista aahista

Ahmad Mushtaq

---

---

jab sham utarti hai kya dil pe guzarti hai
sahil ne bahut puchha KHamosh raha pani

Ahmad Mushtaq

---

---

jaane kis dam nikal aae tere ruKHsar ki dhup
muddaton dhyan tere saya-e-dar par rakkha

Ahmad Mushtaq

---

---

ab shughl hai yahi dil-e-iza-pasand ka
jo zaKHm bhar gaya hai nishan us ka dekhna

Ahmad Mushtaq

---

---