qafile raat ko aate the udhar jaan ke aag
dasht-e-ghurbat mein jidhar ai dil-e-sozan hum the

Taashshuq Lakhnavi

---

---

mauj-e-dariya se bala ki chahiye kashti mujhe
ho jo bilkul na-muwafiq wo hawa paida karun

Taashshuq Lakhnavi

---

---

mujh se kya puchhte ho dagh hain dil mein kitne
tum ko ayyam-e-judai ka shumar aata hai

Taashshuq Lakhnavi

---

---

mujh se lakhon KHak ke putle bana sakta hai tu
main kahan se ek tera sa KHuda paida karun

Taashshuq Lakhnavi

---

---

mujhe hai fikr KHat bheja hai jab se us gul-e-tar ko
hazaron bulbulen rokengi rassi mein kabutar ko

Taashshuq Lakhnavi

---

---

muntazir tere hain chashm-e-KHun-fishan khole hue
baiThe hain dil bechne wale dukan khole hue

Taashshuq Lakhnavi

---

---

najd se jaanib-e-laila jo hawa aati hai
dil-e-majnun ke dhaDakne ki sada aati hai

Taashshuq Lakhnavi

---

---

paD gai kya nigah-e-mast tere saqi ki
laDkhaDate hue mai-KHwar chale aate hain

Taashshuq Lakhnavi

---

---

wo intiha ke hain nazuk main saKHt-jaan hun kamal
ajab tarah ki musibat paDi hai KHanjar pa

Taashshuq Lakhnavi

---

---