dekh kar bhi na dekhna us ka
ye ada to buton mein hoti hai

Khurshid Rabbani

---

---

hawa-e-taza ka jhonka idhar se kya guzra
gire paDe hue patton mein jaan aa gai hai

Khurshid Rabbani

---

---

KHuda kare ki khule ek din zamane par
meri kahani mein jo istiara KHwab ka hai

Khurshid Rabbani

---

---

KHwabon ki main ne ek imarat banai aur
yaadon ka us mein ek daricha bana liya

Khurshid Rabbani

---

---

kis ki KHatir ujaD raste par
phul le kar shajar khaDa hua tha

Khurshid Rabbani

---

---

kisi KHayal kisi KHwab ke liye 'KHurshid'
diya dariche mein rakkha tha dil jalaya tha

Khurshid Rabbani

---

---

kisi ne meri taraf dekhna na tha 'KHurshid'
to be-sabab hi sanwara gaya tha kyun mujh ko

Khurshid Rabbani

---

---

koi nahin jo miTae meri siyah-baKHti
falak pe kitne sitare hain jagmagae hue

Khurshid Rabbani

---

---

matami kapDe pahan liye the meri zamin ne
aur falak ne chand sitara pahan liya tha

Khurshid Rabbani

---

---