diwaren khaDi hui hain lekin
andar se makan gir raha hai

Farigh Bukhari

---

---

do dariya bhi jab aapas mein milte hain
donon apni apni pyas bujhate hain

Farigh Bukhari

---

---

hum ek fikr ke paikar hain ek KHayal ke phul
tera wajud nahin hai to mera saya nahin

Farigh Bukhari

---

---

hum se insan ki KHajalat nahin dekhi jati
kam-sawadon ka bharam hum ne rawa rakkha hai

Farigh Bukhari

---

---

hazar tark-e-wafa ka KHayal ho lekin
jo ru-ba-ru hon to baDh kar gale laga lena

Farigh Bukhari

---

---

jalte mausam mein koi farigh nazar aata nahin
Dubta jata hai har ek peD apni chhanw mein

Farigh Bukhari

---

---

jitne the tere mahke hue aanchalon ke rang
sab titliyon ne aur dhanak ne uDa liye

Farigh Bukhari

---

---

kitne shikwe gile hain pahle hi
rah mein fasle hain pahle hi

Farigh Bukhari

---

---

kya zamana hai ye kya log hain kya duniya hai
jaisa chahe koi waisa nahin rahne dete

Farigh Bukhari

---

---