یہ کس دیار عدم میں۔۔۔

نہیں ہے یوں تو نہیں ہے کہ اب نہیں پیدا
کسی کے حسن میں شمشیر آفتاب کا حسن

نگاہ جس سے ملاؤ تو آنکھ دکھنے لگے
کسی ادا میں ادائے خرام بادصبا

جسے خیال میں لاؤ تو دل سلگنے لگے
نہیں ہے یوں تو نہیں ہے کہ اب نہیں باقی

جہاں میں بزم گہ حسن و عشق کا میلہ
بنائے لطف و محبت، رواج مہر و وفا

یہ کس دیار عدم میں مقیم ہیں ہم تم
جہاں پہ مژدۂ دیدار حسن یار تو کیا

نوید آمد روز جزا نہیں آتی
یہ کس خمار کدے میں ندیم ہیں ہم تم

جہاں پہ شورش رندان مے گسار تو کیا
شکست شیشۂ دل کی صدا نہیں آتی