Wo kahan?

jab bhi dil bhar aaya
aankhen chhalkin

tanhai ke ek goshe mein
us ke kandhe pe sar rakh kar

us se dil ki baaten kah kar
ji kuchh to halka hota tha

us ki dil-jui ki ungli
meri palkon se raKHshan gauhar chun chun kar

apni palkon ke dhage mein
piro ke rakh leti thi

ek din sham ke gahre sae
shajar ke zardi mail aansu

qatra qatra bahte bahte
meri aankhon mein dar aae!

bojhal qadmon se chal kar
us ki banhon mein jaana chaha

har goshe mein us ko DhunD ke haar chuki hun
sab aaine toD chuki hun!