اداس موسم کے رتجگوں میں
ہر ایک لمحہ بکھر گیا تھا
ہر ایک رستہ بدل گیا تھا
پھر ایسے موسم میں کون آئے
کوئی تو جائے
ترے نگر کی مسافتوں کو سمیٹ لائے
تری گلی میں ہماری سوچیں بکھیر آئے
تجھے بتائے کہ کون کیسے
اچھالتا ہے وفا کے موتی
تمہاری جانب کوئی تو جائے
مری زباں میں تجھے بلائے تجھے منائے
ہماری حالت تجھے بتائے تجھے رلائے
تو اپنے دل کو بھی چین آئے
نظم
اداس موسم کے رتجگوں میں
سعد اللہ شاہ