ترجمان مستقبل

تری نگاہ کہ ہے پاسبان‌ مستقبل
سنا رہی ہے ہمیں داستان مستقبل

تری حیات کہ ہے ترجمان مستقبل
لئے ہے کیف‌ و نشاط جہان مستقبل

ہے سر بلند کبھی سے نشان مستقبل
زمیں کو تو نے کیا آسمان مستقبل

تجھی سے غیرت کشمیر ہے دیار وطن
تجھی سے رشک ارم گلستان مستقبل

ترے یقیں نے کیا ہے وہ انقلاب عظیم
کہ عہد حال پہ اب ہے گمان مستقبل

چمن کے خواب کی تعبیر ہے جنوں تیرا
ہوئے ہیں غنچہ و گل نکتہ دان مستقبل

ترے نفس بہ نفس ارتقا زمانے کا
ترے قدم بہ قدم ہے زمان مستقبل

شب حیات کی اس بے پناہ ظلمت میں
نقوش پا ہیں ترے کہکشان مستقبل

ہر اک نفس ہے ترا ہم رکاب عصر رواں
ہر اک نظر ہے تری کاروان مستقبل

امین راز وہی ہے وطن کی قسمت کا
ترا جمالؔ کہ ہے راز دان مستقبل