Recyclebin

lafz wapas nahin hua karte
talKHiyon mein ghule hue lahje

zarf ke hath kya hi mahir hon
phul ban kar nahin khila karte

hazf karne ka aasra le kar
koi tahrir likh nahin dena

bhul jaane ki iltija le kar
mat kaho koi harf-e-na-bina

kal jo KHali gaya tha war koi
kargar aaj ho bhi sakta hai

bhuli-bisri gawahiyon ka shajar
bar-war aaj ho bhi sakta hai

nazar-andaz hone wala dard
mo'atabar aaj ho bhi sakta hai

waqt ki dhul mein ulajh kar bhi
zinda rahta hai sans leta hai

naqsh aawaz ka ho harf ka ho
lakh ghaeb karo nigahon se

dil ke andar kahin pe rahta hai
naqsh ban kar nahin miTa karte