رفتگاں

ہیں یاد ہائے رفتہ کے دیوار و در کہاں
وہ سنگ آستاں کہاں وہ رہ گزر کہاں

دشت وفا میں دعوت دیوانگی کسے
مجبور غم کو رخصت آہ سحر کہاں

ان راستوں میں ڈھونڈتے پھرتے ہیں نقش پا
اے ہمرہان تازہ وہ اہل سفر کہاں

ہے کون جس کو نذر کریں آنسوؤں کے پھول
لے جائیں آج آبروئے چشم تر کہاں

ہر اجنبی سے پوچھ رہے ہیں نشان راہ
نو واردان شہر کو گھر کی خبر کہاں

در در کی خاک چھانتے یہ دن تو کٹ گیا
اب فکر شب ہے دیکھیے ہوگی بسر کہاں