Nigah-e-baz-gasht

aaj thi mere muqaddar mein ajab saat-e-did
aaj jab meri nigahon ne pukara tujh ko

meri tishna-nigahon ki sada
koi bhi sun na saka

sirf ek tere hi dil tak ye sada
jagti duniya ke kohram se chup-chap guzar kar pahunchi

sirf ek tu ne palaT kar meri jaanib dekha
mujhe tu ne tujhe main ne dekha

aaj thi meri nigahon ke muqaddar mein ajab saat-e-did
kya KHabar phir to palaT kar meri jaanib kabhi dekhe ki na dekhe lekin

ek umr ab main yunhi apni taraf dekhte dekhunga tujhe