shash shor mat karo
zamin ki aankh khul jaegi
main koi raaz nahin
jise tum fash kar doge
KHwahishon ke gale ghonT kar
katbon par mere KHwab likhte ho
tabir ke lalach mein
mujhe to KHwab mat batao
main jitna TuT sakta tha, TuT chuka
kya tum mere chure se
apni aankhon ki kenchuli ranganna chahte ho
meri be-libasi tumhaara pahnawa to nahin!
meri KHamoshi par
tumhaari aawaz ka kafan kam paD raha hai!
to chillate kyun ho?
jaante nahin?
shahr pahle hi meri tohmat se gunj raha hai!!!
Nazm
Meri be-libasi tumhaara pahnawa nahin
Anjum Saleemi