Mere andar

kaenat ke intizam mein
ek chhoTa sa zarra hun main

lekin itna jaan gaya hun
mere andar ek sahra hai

jo sadiyon se pyasa hai
main wo amrit DhunDh raha hun

jis se us ki pyas bujhe
mere andar hai ek sagar

kitna gahra koi na jaane
ghota-KHor ke rup mein aksar koshish ki hai

us ki tah tak pahunch sakun
be-shak baDe nizam ka

chhoTa sa hissa hun
lekin mujh mein wo wusat hai

jis mein sau sahra kho jaen
mujh mein hai gahrai aisi

jis mein kai samundar Dube
mere andar ek anokhi duniya hai

kaenat us ka chhoTa sa hissa hai