معذرت

میرے خواب گھروندے میں میرے ساتھ ہیں
مردہ لمحوں کے بے رت باسی کلینڈر

گزری کل کے بھیگے بھیگے سے پچھتاوے
آنے والی کل کے بے کل سے اندیشے

سوکھے پھولوں کی ٹہنی پر
پت جھڑ کے جھونکوں سے اڑتی بے گھر تتلی

پیلے پتوں کی مرجھائی بیل سے لپٹی
سہمی چڑیا

اس کی آنکھوں کے گہرے ویران سمندر
کمرے کے کونے میں سنوری گونگی گڑیا

شیلف میں رکھی سجی سجائی سرد کتابیں
رستہ ڈھونڈھتی بھٹکی بھٹکی صبحیں شامیں

خود ہی سوچو
ایسے پر آواز ہجوم میں

ایسے گھر میں
تم کو لا کے کہاں بٹھاؤں