Kya aag sab se achchhi KHaridar hai

lakDi ke bane hue aadmi
pani mein nahin Dubte

aur diwaron se Tange ja sakte hain
shayad unhen yaad hota hai

ki aara kya hai
aur daraKHt kise kahte hain

har daraKHt mein lakDi ke aadmi nahin hote
jis tarah har zamin ke TukDe mein koi kar-amad chiz nahin hoti

jis daraKHt mein lakDi ke aadmi
ya lakDi ki mez

ya kursi
ya palang nahin hota

aara banane wale use aag ke hath bech dete hain
aag sab se achchhi KHaridar hai

wo apna jism muawze mein de deti hai
magar

aag ke hath gili lakDi nahin bechni chahiye
gili lakDi dhup ke hath bechni chahiye

chahe dhup ke pas dene ko kuchh na ho
lakDi ke bane hue aadmi ko dhup se mohabbat karni chahiye

dhup use sidha khaDa hona sikhati hai
main jis aare se kaTa gaya

wo maqnatis ka tha
use lakDi ke bane hue aadmi chala rahe the

ye aadmi daraKHt ki shaKHon se banae gae the
jab ki main daraKHt ke tane se bana

main har kamzor aag ko apni taraf khinch sakta tha
magar ek bar

ek jahannam mujh se khinch gaya
lakDi ke bane hue aadmi

pani mein bahte hue
diwaron par Tange hue

aur qataron mein khaDe hue achchhe lagte hain
unhen kisi aag ko apni taraf nahin khinchna chahiye

aag jo ye bhi nahin puchhti
ki tum lakDi ke aadmi ho

ya mez
ya kursi

ya diya-salai