KHwab

bahut dinon se udas hai dil
bahut dinon se main ro raha hun

mera asasa to KHwab the par
main gahri nindon mein so raha hun

main ek kirdar ban gaya hun
main dastanon mein kho raha hun

ye kaisa mausam hai mere dil mein
gulon mein kanTe piro raha hun

main saf-suthra libas le kar
gali ke pani se dho raha hun

main apni hairat ki khoj mein tha
main gahri nindon mein so raha hun

bahut dinon se udas hai dil
bahut dinon se main ro raha hun

koi to zarKHez KHwab malik!
main KHushk lafzon ko bo raha hun!