kal jis jagah ye chhanw ghani thi
jahan pe tum ne mujh se wada
liya tha dobara milne ka
main us jagah pe aaya tha
magar wahan dhup kaDi thi
tum to na thin lekin
tum se milti-julti
jhurriyan jhurriyan chehre wali
koi aurat
kabhi jo KHud bhi
kisi se milne
isi jagah par aai hogi
qahr-alud nigahon se mujhe ghur rahi thi
main lauT aaya
tere aur mere jazbon ke
bich mein ek fasil khaDi thi
aur upar se dhup kaDi thi!
Nazm
Kal aur aaj
Ahmad Rahi