Intisab

shikayat na karna
agar ye zamana pukare tumhein

aur sada meri aawaz ki gunj ho
shikayat na karna

agar log muD muD ke dekhen tumhein
aur har shakl mein meri muskan tum ko

dikhai bhi de aur sunai bhi de
shikayat na karna

agar har zaban par
tumhaare bajae mera nam ho

tumhein meri aankhon ki tarif karte hue
sochna chahiye tha

yahan sans lete hue KHwab
har aankh ke KHwab jaise nahin hain

yahan KHwab aankhon se bah jaen to
ashk bante nahin hain

pighalte nahin hain
tumhein mere hathon ki narmi ko mahsus karte hue

bhulna to nahin chahiye tha
ki ek hath mein ek KHali waraq

dusre mein qalam hai
shikayat na karna

agar KHushnuma raushnai mein pahle waraq par
tumhein log paDh len