Hum kyun likhte hain?

zehn ki zaminon mein jaDen phailata ye sawal
ki hum kyun likhte hain?

be-kar mein apne waqt ki daulat luTa kar
taKHliqi karb ke nae zaichon mein

KHud ko kyun qaid karte hain?
main sochta hun

ki adalat mein jab mujrim pesh hota hai
ye jaante hue bhi ki wahi mujrim hai

us ka bayan kyun likha jata hain?
gawahon ki shahadat kyun tahrir ki jati hai?

magar steno se koi nahin puchhta
ki tum ye sab kyun likhte ho?

shayad is liye ki sab jaante hain
in bayanat ke andar hi

mujrim ki saza-jaza ke sabhi naqshe tartib pate hain
hum is liye likhte hain

ki viraniyon ki barish mein
jazbe jab dilon se hijrat kar jate hain

jab surKH chehre wale jismon ke andar kahin
safed barish hone lagti hai

jab unchi diwaron ke bich
kisi kuTiya mein chupke se

roz an-ginat KHwahishen dafnai jati hain
aur kitne hi laghar badanon ke andar

bhuk chhup kar unhen khati rahti hai
jab chiKHon ke hazaron lashkar

aanganon par chaDhai karte hain
to waqt udasi ke sahife liye

in hadson ka chashm-did gawah ban kar
ahl-e-qalam ke pas apni gawahi likhwane aata hai

hum waqt ki sachchi shahadat likh kar
maashre ki saza-jaza ke

raston ki nishan-dahi karte hain
magar hairan hun

phir bhi puchha jata hai
ki hum kyun likhte hain