Faisle ki ghaDi

barishen phir zaminon se naraaz hain
aur samundar sabhi KHushk hain

khurduri saKHt banjar zaminon mein kya boiye aur kya kaTiye
aankh ki os ke chand qatron se kya in zaminon ko sairab kar paoge

gandum o jau ke KHoshon ki KHushbu tumhaara muqaddar nahin
aasmanon se tum ko raqabat rahi

aur zaminon se tum be-talluq rahe
riDh ki ek haDDi pe tum ko bahut naz tha

ye guman bhi na tha
ek din be-lahu ye bhi ho jaegi

faisle ki ghaDi aa gai kuchh karo
titliyon ke sunahre hare surKH nile paron ke liye

aankh ki os ke chand qatron se banjar zamin ke kisi goshe mein
phul phir se ugane ki koshish karo