Dube hue gulab mein wo jism ke KHutut
jab yaad aae hain
aaankhon mein kitne rang-mahal jagmagae hain
jab yaad aae hain
wo jism ke KHutut
wo jism ke KHutut ki ek dil-nashin pukar
chahat ki rah mein
hum ne suni thi jo kabhi pahli nigah mein
chahat ki rah mein
ek dil-nashin pukar
is dil-nashin pukar ka anjam-e-dil-gudaz
kaise bhulaen hum
dete rahenge dair-o-haram ko duaen hum
kaise bhulaen hum
anjam-e-dil-gudaz
Nazm
Diwaren
Qateel Shifai