Andesha-ha-e-dur-daraaz

teri KHwahish ne kis tashkik ka malbus pahna hai
teri babat kisi se puchhne mein KHauf aata hai

wo jaane kya hai
tere bare mein koi baat bhi karta hun to Darta hun

jaane guftugu kya rang pakDe
teri babat kisi se koi rae bhi talab karte larazta hun

wo jaane tujh ko kaisa nam de
mere ehsas ko kis shak ne jakDa hai

yahi kyun sochta hun ab to pahle sa nahin hai
ab tere bare mein logon ka wo pahla sa tasawwur bhi nahin hai