Imtihan

hujum-e-ranj-o-alam
kai paikaron mein Dhal kar chahaar jaanib pe chha raha hai

zamin aatish-fishan hai aur aasman se barish-e-sitam hai
samundaron mein ghazab ke tufan

sulagte jalte hue kaThin raston mein patthar
hum un ke narghe mein

istaqamat se chal rahe hain
qadam qadam gir rahe hain gir kar sambhal rahe hain

ye us ki chahat ki aazmaish hai
aur be-laus-o-be-gharaz jazba-e-wafa ka

hasin tohfa
ye us ki chahat ki ek sanad hai

ye us ki nazron mein imtihan hai