zindagi mein kisi ruKH ka kisi dukh ka hona
achchha hota hai safar mein koi apna hona
dard bhi mauj ke manind safar karte hain
achchha rahta hai palak par koi tara hona
Thokaren marne lagta hai lahu nas nas mein
kitna dushwar hai tera mera apna hona
ek hum hain ki tere ho ke bhi aawara hain
apni taqdir hai aawaza-e-sahra hona
kargar kaun raha kar-e-wafa mein 'KHalid'
kis ki qismat mein hai farhad ka tesha hona
Ghazal
Zindagi mein kisi ruKH ka kisi dukh ka hona
Khalid Ahmad