زندگی خاک بسر شعلہ بہ جاں آج بھی ہے

زندگی خاک بسر شعلہ بہ جاں آج بھی ہے
تجھ کو کھو کر تجھے پانے کا گماں آج بھی ہے

ایک بے نام سی الجھن ہے دل و جاں پہ محیط
ایک غم نام سا احساس زیاں آج بھی ہے

خاک سے تا بہ فلک تیری نگاہوں کا طلسم
ٹھہرا ٹھہرا سا جہان گزراں آج بھی ہے

ترک الفت میں بھی الفت کے نشاں باقی ہیں
قافلہ لٹ کے تری سمت رواں آج بھی ہے

کتنے ساقی ہیں کہ ہیں جام بکف کل کی طرح
شغل مے ہے کہ سحرؔ بار گراں آج بھی ہے