zindagi ke kaise kaise hausle pathra gae
aarzu se chal ke tark-e-arzu tak aa gae
yaad hai itna ki ubhra tha koi aks-e-jamil
aur phir yaadon ke sare aaine dhundla gae
mere mazi ke chaman mein the jo kuchh yaadon ke phul
rafta rafta zindagi ki dhup mein kumhla gae
zindagi bhi hai tumhaare gham ke pas-e-manzar ki den
jab bhi main jine se tang aaya hun tum yaad aa gae
Ghazal
Zindagi ke kaise kaise hausle pathra gae
Raunaq Raza