زیست ہے اک معصیت سوز دلی تیرے بغیر

زیست ہے اک معصیت سوز دلی تیرے بغیر
ہاں محبت بھی ہے اک آلودگی تیرے بغیر

شام غم تیرے تصور ہی سے آنکھوں میں چراغ
ورنہ میرے گھر میں ہو اور روشنی تیرے بغیر

یہ جہاں تنہا بھلا کیا مجھ کو دے پاتا شکست
میں نے کب کھایا فریب دوستی تیرے بغیر

رات کے سینہ میں ہے اک زخم جس کا نام چاند
اک سنہری جوئے خوں ہے چاندنی تیرے بغیر

ہر نفس ہے پے بہ پے ناکامیوں کا سامنا
زیست ہے اک مستقل شرمندگی تیرے بغیر

دے گئی دھوکا مگر شائستگیٔ غم مری
آ رہا ہے دل پہ الزام خوشی تیرے بغیر

علم و عقل و نام و جاہ و زور و زر سب ہیچ عشق
ہو کے سب کچھ بھی نہیں کچھ آدمی تیرے بغیر

دل کی شادابی کی ضامن ہے تو ہی اے یاد دوست
آ نہ پائی غم کے پھولوں میں نمی تیرے بغیر

ایک اک لمحہ میں جب صدیوں کی صدیاں کٹ گئیں
ایسی کچھ راتیں بھی گزری ہیں مری تیرے بغیر

زندگی ملاؔ کی ہے محجوب نام زندگی
رہ گئی ہے شاعری ہی شاعری تیرے بغیر