zara si raat Dhal jae to shayad nind aa jae
zara sa dil bahal jae to shayad nind aa jae
abhi to karb hai be-chainiyan hain be-qarari hai
tabiat kuchh sambhal jae to shayad nind aa jae
hawa ke narm jhonkon ne jagaya teri yaadon ko
hawa ka ruKH badal jae to shayad nind aa jae
ye tufan aansuon ka jo umaD aaya hai palkon tak
kisi surat ye Tal jae to shayad nind aa jae
ye hansta muskuraata qafila jo chand taron ka
'farah' aage nikal jae to shayad nind aa jae
Ghazal
Zara si raat Dhal jae to shayad nind aa jae
Farah iqbal