Zahr in ke hain mere dekhe hue bhaale hue

zahr in ke hain mere dekhe hue bhaale hue
ye to sab apne hain zer-e-astin pale hue

un ke bhi mausam hain un ke bhi nikal aaenge Dank
be-zarar se ab jo baiThe hain sipar Dale hue

chaak si kar jo hare mausam mein iThlate phire
KHushk-sali mein wo tere chahne wale hue

baDh ke jo manzar dikhate the kabhi sailab ka
ghaT ke wo dariya zamin par rengte nale hue

kaise kaise na-gahani hadse likkhe gae
yaad ke pahle waraq kis kis tarah kale hue

kuchh udasi ban ke phaile us ke ruKHsaron ke gird
kuchh siyah baadal ke TukDe chand ke haale hue

pahle ro lete the ab galiyon ke pheron ka hai shaghl
pahle jo aansu the ab wo panw ke chhaale hue

chhalki har mauj-e-badan se husn ki dariya-dili
bul-hawas kam-zarf do chullu mein matwale hue

khul gae to bu-e-mani har taraf uDti phiri
band ho kar lafz 'baqar' nutq par tale hue