zabt se yun bhi kaam liya hai
kanTon mein aaram liya hai
chahe jidhar le jae mohabbat
ab to daman tham liya hai
kash wahi aaram se rahta
jis ne mera aaram liya hai
husn ne jab Thokar khai hai
ishq ne bazu tham liya hai
saqi ka ehsan nahin hum par
KHun diya hai jam liya hai
Thokar khai baDh gae aage
nakaami se kaam liya hai
husn-e-butan ko dekh ke 'shaarib'
hum ne KHuda ka nam liya hai
Ghazal
Zabt se yun bhi kaam liya hai
Sharib Lakhnavi