ضبط غم ہے مری پوشاک مری عزت رکھ
آتش دیدۂ نمناک مری عزت رکھ
کھل نہ جائے یہ مری عکس فریبی کسی دن
آئنہ خانۂ ادراک مری عزت رکھ
میری مٹی سے چراغ در و دیوار بنا
در بدر کر کے مری خاک مری عزت رکھ
پرتو داغ گزشتہ رخ فردا پہ نہ ڈال
گردش ساعت سفاک مری عزت رکھ
بڑی مشکل سے بنائی ہے یہ عزت میں نے
جذبۂ کار ہوس ناک مری عزت رکھ
یا سمندر سے مری خاک جدا کر شاہدؔ
یا بنا دے مجھے تیراک مری عزت رکھ
غزل
ضبط غم ہے مری پوشاک مری عزت رکھ
شاہد ذکی