yunhi be-baal-o-par khaDe hue hain
hum qafas toD kar khaDe hue hain
dasht guzra hai mere kamre se
aur diwar-o-dar khaDe hue hain
KHud hi jaane lage the aur KHud hi
rasta rok kar khaDe hue hain
aur kitni ghumaoge duniya
hum to sar tham kar khaDe hue hain
barguzida buzurg nim ke peD
thak gae hain magar khaDe hue hain
muddaton se hazar-ha aalam
ek ummid par khaDe hue hain
Ghazal
Yunhi be-baal-o-par khaDe hue hain
Ammar Iqbal