یہ نہ پوچھو تم خدارا کہ مرا مکاں کہاں ہے

یہ نہ پوچھو تم خدارا کہ مرا مکاں کہاں ہے
جسے آگ دی ہے تم نے وہی میرا آشیاں ہے

تمہیں کیا سناؤں اب میں غم عشق کا فسانہ
وہی قصۂ علم ہے وہی غم کی داستاں ہے

مجھے روشنی ملے گی رہ زیست میں اسی سے
ترا نقش پا ہے جاناں کہ چراغ کارواں ہے

مری ہر نشاط و غم کو تری ذات سے ہے نسبت
تو جو آئے تو بہاراں تو نہ آئے تو خزاں ہے

وہ بہار صبح روشن یہ اندھیرے شام غم کے
وہ تو ان کی تھی کہانی یہ ہماری داستاں ہے

وہی زندگی کا لمحہ کہ جو تیرے ساتھ گزرا
وہی مختصر سا لمحہ مری عمر جاوداں ہے

نہیں کچھ سمجھ میں آتا کہ امیدؔ کو ہوا کیا
نہ ہے لب پہ حرف شکوہ نہ زباں پہ اب فغاں ہے