ye mausam-e-gul garche tarab-KHez bahut hai
ahwal-e-gul-o-lala gham-angez bahut hai
KHush dawat-e-yaran bhi hai yalghaar-e-adu bhi
kya kijiye dil ka jo kam-amez bahut hai
yun pir-e-mughan sheKH-e-haram se hue yak-jaan
mai-KHane mein kam-zarfi-e-parhez bahut hai
ek gardan-e-maKHluq jo har haal mein KHam hai
ek bazu-e-qatil hai ki KHun-rez bahut hai
kyun mishal-e-dil 'faiz' chhupao tah-e-daman
bujh jaegi yun bhi ki hawa tez bahut hai
Ghazal
Ye mausam-e-gul garche tarab-KHez bahut hai
Faiz Ahmad Faiz