ye kis liye hai tu itna udas darwaze
pahan liya hai jo kala libas darwaze
tu sham-rang hua ja raha hai subh se kyun
jhalakti hai teri surat se yas darwaze
nihaarte ho ye kis kis ko nim-wa ho kar
parae des mein kaisi ye aas darwaze
hinai hath ke wo lams chhin gae jin se
bane hue hain sarapa sipas darwaze
makin makan mein na hoga to phir kahan hoga
yahin kahin hai tere aas-pas darwaze
libas aur hai lekin main koi aur nahin
mujhe tu bhul gaya ru-shanas darwaze
mujhe bhi hairat-o-'hasrat' ne but bana Dala
tujhe bhi zindagi aai na ras darwaze
Ghazal
Ye kis liye hai tu itna udas darwaze
Ajeet Singh Hasrat