ye kis KHalish ne phir is dil mein aashiyana kiya
phir aaj kis ne suKHan hum se ghaebana kiya
gham-e-jahan ho ruKH-e-yar ho ki dast-e-adu
suluk jis se kiya hum ne aashiqana kiya
the KHak-e-rah bhi hum log qahr-e-tufan bhi
saha to kya na saha aur kiya to kya na kiya
KHusha ki aaj har ek muddai ke lab par hai
wo raaz jis ne hamein randa-e-zamana kiya
wo hila-gar jo wafa-ju bhi hai jafa-KHu bhi
kiya bhi 'faiz' to kis but se dostana kiya
Ghazal
Ye kis KHalish ne phir is dil mein aashiyana kiya
Faiz Ahmad Faiz