Ye jo har samt tere neze ki shohrat hai bahut

ye jo har samt tere neze ki shohrat hai bahut
sach to ye hai ki mare sar ki badaulat hai bahut

chashma-e-chashm ke pani se nahin hoga kuchh
KHak-e-sahra hai ise KHun ki zarurat hai bahut

main to ek aankh hun aawaz se mujh ko na Dara
ye tere jalwa-e-sad-rang ki dahshat hai bahut

but-e-mani bhi maani ke pujari bhi gae
aa ki ab mabad-e-alfaz mein KHalwat hai bahut

KHak hi shahr-o-bayaban ki agar daulat hai
to ye aawara tera sahab-e-sarwat hai bahut