یہ احتیاط عشق پہ لازم صدا رہے

یہ احتیاط عشق پہ لازم صدا رہے
ہر چند قربتیں ہوں مگر فاصلہ رہے

حاجت نہیں کی جام و سبو مے کدہ رہے
دل کا تری نگاہ سے بس رابطہ رہے

ماہ و نجوم و شمس کی تھم جائیں گردشیں
ٹھہرے تری نظر تو زمانہ رکا رہے

معمور خوشبوؤں سے رہے گلشن وجود
بس اک تجھی کو ذہن اگر سوچتا رہے

رعنائی جمال کا عالم نہ پوچھیے
اک بار دیکھ لے جو اسے دیکھتا رہے

فریاد لے کے جائیں بھی اہل چمن کہاں
جب باغباں خود اپنا چمن لوٹتا رہے

کچھ دیر اور اے شب ہجراں ٹھہر ابھی
کچھ دیر اور درد کا طوفاں اٹھا رہے